فى يوم من ايام عودتي من شغلى الأزلى
مريت على الكشك اللى على ناصية شارعنا
لقيت المغرب أذن وكنت عايزة اجيب عصير
وقفت نقيت العصير اللى انا عايزاه
ورايحة ادفع الفلوس لعمو بتاع الكشك
لقيت شاب كويس كدة
لابس بدلة
وشكله محترم يعني
بيسأل عمو بتاع الكشك عن حاجة جالى اسبهلال منها
او ازبهلال
مش عارفة بتتكتب ازاى
المهم
بيقوله عندك "ورقة بفرة"وسجاير مش عارفة ايه كدة
لقيت الكشك اداله ورقة رفيعة كدة
مع علبة السجاير
وانا حاسة بالبتاع
اصل انا كنت سألت احمد اخويا على ورقة البفرة دي
وقالى انها اللى الناس بيلفوا فيها الحشيش
فانا لولا كدة مكونتش ازبهليت لما شوفت الولد بيطلبها
المهم لما الولد دفع الفلوس ومشي
قولت لازم اعلق على الموضوع ده
بقول لعمو:
هو ورق البفرة ده بتاع الحشيش ؟؟؟
قالى : هو حسابنا كام ؟؟
قولتله على حسابنا وحسيت انه بيتهرب من سؤالى المفاجيء الصريح
والظاهر افتكرنى من مباحث المخدرات
فكررت سؤالى عليه
قالى ممممم ... اه
قولتله : انت بتبيع الورق ده ليه ؟؟؟
لقيته بصلى بصة طويلة ومتنحة
ومردش عليا
وادانى الباقي وهو بيتمتم بكلمة :عادى بقي يعني هي جت على دي
واخدت منه الباقي وماشية
بس قبل ماامشي
قولتله فى لهجة ساخرة ومشمئزة :
مش كفاية انك بتبوظهم بالسجاير
كمان حشيش
وطبعا مشيت بسرعة
قبل ما اسمع كلمة لا ترضيني او اتضرب
او اتحدف بحاجة
بس كان نفسي اعرف ليه كدة بجد يعني ؟
طيب هو بيبيعها عايز يكسب ومش يهمه المباديء
لكن ليه شباب كويسين كدة يشربوا حشيش؟؟
هو عادي ولا ايه ياجماعة ؟؟؟
بس كدة
هو ده كل اللى حصل
انهاردة
الاثنين 3 مايو 2010
--------------
وجوجل بيحتفل بيوم ميلاد ام كلثوم
سبحان الله
-------------
(كفايــــة طيبـــــة)
7 Commentzzzzzz:
السؤال هنا هو لماذا ؟؟
لماذا ؟؟
لماذا ؟؟
لماذا ؟؟
لماذا ؟؟
لماذا ذهبتي لشرب شوب من العصير القصب ...؟؟
هذا هو السؤال الحقيقي ؟؟ وهو سؤال لولبي جدا ؟؟ محوري ؟؟ يدور في فلك سرمدي لا نهائي متناهي الدقه والازبهلاليه الغير مستدقه والتي تتمحور حول كيفيه الاستنتطاق الجوفمعوي الغير ذاتي ؟؟؟
من الاخر بقا ...
انت غلظانه .. والغلط راكبك من ثاثك لراثك بمعني .. انه للأسف السينما شوهت المبادئ وفهمتنا كلنا ان الحشيش ومستلزماته بتتباع في الخرابات الساعه اتنين بالليل بعد ما تقول كلمه السر .. الكتكوت المفترس .. وتنور بالكشاف مرتين اه ومره لأ ...
الحقيقي بقا ,, ان طبيعي جدا انك تلاقي الحشيش بيتباع دلوقتي في المعصره وفي البقاله وفي المخبز الالي ...
بعدين بصراحه انتي اللي غريبه ..
اولا .. هو لسه فيه حد بيشرب عصيرقصب ..ثانيا .. حد يروح يشتري عصير قصب من المعصره برضه !!! ده كلام يا رمضان .. ناقص تقولي انك بتشتري اللب من المقله ...
مش معقول ابدا ... يا ثاتر .. يا ثاتر ..
مممم
ممكن يكون مش شاريه للهدف ده
الورق ده كنا بنشتريه فى الكلية علشان بينضف الشرائح كويس جدا
و لو طلعت دى الحقيقة
يبقى السؤال
هو احنا ليه بناخد بالظاهر و نحكم على الاخر من غير ما نكلف نفسنا حتى السؤال
اممممممممم
O_o
وهو د العادى من بنك مصر
ربنا يهدي شباب المسلمين والشعب كله يااااااااااارب
كل التحية
انتى لفت نظرك حاجه بسيطه اوى ان ليه الراجل بيبع ورق بفره
لو هو مابعش غيره هيبيع
وبعدين صراحه بقى مش المهم هو بيبيعه ليه
انا بيتهيالى المهم ان الشباب دول بيشربوا ليه
وانتى بتقولى شاب شكله محترم وبستغرب فعلا الموضوع ده
ان شاب يكون كويس واخلاقه كويسه وفجأه تكتشفى انه بيعمل بلاوى ايا كان نوعها بس بتعبر عن حاجه واحده بس
اننا مازلنا فاهمين الاحترام والاخلاق غلط وبناخدها لاول مره بالمنظر اللى قدامنا وبس
ربنا يهدينا كلنا
ربنا يهدي الجميع يارب
تقريبا هو بقي عادي اوي شرب الحاجات دي دلوقت
Post a Comment