اخر درجات الزهق

زهقت من تزويق الكلام 

وترتيبه 

عشان اللى ادامى ميزعلش

زهقت من انى اختار كل لفظ مناسب 

عشان اراعي شعور اللى حواليا 

زهقت انى اقعد ادادى فى اللى بتكلم معاه لو فلتت مني كلمة غصب عني 

تنم عن ضيقي منه  

وانا مكونتش عايزة اضايقه  ومستحملاه 

زهقت من انى استحمل  حد  

زهقت من انى اجى على نفسي 

زهقت اوى 

ليه منحسش من نفسنا  يعني ؟

ليه لازم الناس تقل ذوقها مع اللى متضايقة منهم عشان يفهموا انهم مش طايقينهم 

مينفعش نحس بقي وحدنا ؟

هي الناس ليه مربتش عيالها على عدم التدخل فى شؤون الاخرين ؟؟؟

ليه مربوش عيالهم على الذوق 

والأخلاق  

والاحساس العالى 

هى دي حاجات صعبة ؟؟؟ 

ليه ميبقاش عندي دم وحدى  من غير ما اتهزق  

امال ايه اللى بيميز آدميتنا  ؟؟؟ 

مش الاحساس والعقل والتفكير بردو  ؟؟؟ 

ليه بجد قليل اوى اللى يربي عياله على الـ أخلاقيات دي 

ليه الناس شايفة التربية ان العيال تدخل مدرسة لغات وتاكل احسن اكل وتشرب عصير طبيعي كل يوم عشان يتربي 

فين التربية على الاحساس ؟؟؟

فين لما اشوف حد متضايق مني ابعد عنه او اعتذرله ؟؟ 

ده اذا كنت ضايقته اصلا غصب عني 

فين التربية على انى لما اشوف حد متعصب امتص عصبيته  واهدّيه 

معصبوش اكتر 

فين التربية على ان البني ادم يعترف بغلطه لما يغلط  ؟

فين التربية على الاخلاق العالية ومعاملة من هم اقل مننا اجتماعيا  زينا زيهم 

مش ذنبهم انهم مكملوش تعليمهم 

وده ميخليهومش اقل مننا فى أى حاجة  

ده ميدنيش تصريح انى اشخط فيه ولا اعامله معاملة  حد ناقص عني فى حاجة 

على فكرة 

مش دة البوست خالص اللى انا كنت داخلة اكتبه 

مش عارفة ازاى بقي كدة  

زهقت من القيود على الكلام  فى وقت 

كنت دايما افكر اكتب ايه فى البلوج قبل مااكتب 

لغاية ما لقيتني مش بكتب حاجة 

+

ان البلوج اتملت درافتات مش منشورة 

وكل ده عشان مش عارفة اكتب براحتي 

دى حاجة من اللى زهقت منها بردو  

زهقت من منظر البنت اللى تهزر بطريقة مسفة مع شاب فى الشغل  عشان يعملها اللى هي عايزاه 

وتخلص شغلها  وتعطله 

زهقت اوى  بجد من الاشكال دي  

زهقت من العيشة واللى عايشينها 

الحمدلله بجد ربنا كارمنى بحاجات كتير لازم احمده عليها  

بس انا بتكلم عن الزهق من الاوضاع اللى حواليا 

زهقت من انى يوحشنى ناس وهم دايما مش موجودين 

زهقت من انشغال ناس مهمة  عني 

وزهقت من اهتمام  ناس  تزهق بيا 

زهقت من الغباء  

زهقت من الروتين .. صحيان ونوم وشغل واكل 

ماشي كويس 

بس فين الهدف ؟؟؟؟ 

فين الرسالة بتاعتى فى الدنيا ؟؟؟؟

نفسي الاقيها 

نفسي احط ايدي على اول مشوارها  

وانا هعافر عشان اوصل  انى اكملها 

بس اعرفها  بس 

مش معقول رسالتى هتقتصر على انى اتجوز واجيب اولاد اربيهم تربية كويسة وخلاص 

طبعا دي رسالة رهيبة وليها احترامها المعروف من اى حد 

بس  قبل الجواز 

خمسة وعشرين سنة على الاقل  

بتعمل ايه فى دنيتك ؟

مش عارفة بجد  

تصبحوا على خير 

>_>

(كفــــــاية زفت طيبــــة)