الصورة والهوامش

حالة من التشتت
وعدم التركيز فى اى حاجة
وحالة من البعد عن كل الناس
وحتى بحاول ابعد عن أى حد يحاول يفهمني
اول ما احس ان فى حد ابتدي يفهم اى حاجة جوايا بقفش وباخدلى جنب
واقفل على اللى جوا تانى
كأن حد مسك دماغى
واخدها
وطلع بيها للدور الخمستاشر
ورماها من فوق
قامت وقعت اتفتفتت مليون حتة
قاعدة اجمع فيهم
ومش عارفة
بفكر فى 90 حاجة مع بعض
وكل حاجة مش مركزة فيها بالقدر الكافى
قافلة التليفون
ومش برد على تليفون البيت
عندي رغبة فى رمي اى تليفون بيرن ادامى فى البحر
حتى لو مش تليفوني
بقيت بشكل تلقائي لما اسمع تليفون حد برة وانا ماشية فى الشارع
اقول : يوووووووه
مش عايزة ارد على حد
ولا اكلم حد
مش عايزة اشوف حد
ولا اقابل حد
نفسي اقابل حد مقابلتوش بقالى كتيييير اوى ومش عارفة مين
نفسي اقابل حد يعرفنى من زمان بس ميعرفنيش دلوقتى
يفكرنى بيا زمان
نفسي افتكرنى كنت عاملة ازاى
هو انا ليه بقيت عاملة كدة دلوقتى ؟
ليه بجد
انا عمرى ما كنت كدة
ليه بقيت ببعد دايما
اسهل حاجة عندي من اى شيء يتعبني
أبعد عنه
هو ده بقي اسهل حل خلاص ؟
ولا انا بستسهل
ولا بكسل احاول اقرب
ولا ده هروب
والله مش هروب
بجد مش بدافع عن نفسي
بس انا مش بهرب من حاجة
لا
انا بهرب ساعات
عشان مكدبش
بس مش دايما بهرب والله

ساعات بيبقي فى حاجات او ناس معينة فى حياة كل بني ادم فينا
زي تزويق ليها
او بمعني أدق
هوامش
ممكن نستغني عنها
عشان نخلي الاطار اد الصورة بالضبط
كنت زمان بنبسط اوى من الهوامش دي
واقول كدة احسن
عشان لو قطعنا من الصورة الاصلية
الهامش يخبي مكان الجرح
ويخليه ميبنش
ويفضل المنظر حلو كدة

بس انا دلوقتى
بقيت العكس
بقيت عايزة اقص كل الهوامش
واشيل كل حاجة وكل حد ملوش لازمة فى حياتي
ومسببلى ازمة ومشاكل وضغط نفسي وخلاص
ولغاية دلوقتى
انا مش عارفة العيب من مين
العيب فيا ولا فى الهوامش ؟
الهوامش شكلها اتغير
وبقت بدل ما تخلى المنظر جميل وتداوى قص الصورة الاصلية
بقت تخدش الصورة الاصلية
وتخليها مش واضحة كويس جوايا
بس مجرد انك سمحت للهوامش تدخل مساحة صورتك
فانت مسؤول انك تستحملها على الصورة فترة مش قليلة
فى ناس ريحت دماغها من الاول
ومش حاطة هوامش بس
لا دي كمان مش حاطة صورة اصلا
بتحب البرواز بتاعها من غير صور ولا هوامش
كنت بستغرب اوى ازاى الناس دي عايشة
بس دلوقتى
لما جاتلى حالتى دي
نفسي اعيش زيهم
لا
مش بالبرواز بس
بالصورة كمان جواه

مش عارفة هقدر اعمل ايه ؟
هتعامل مع الهوامش كويس زي الاول
ولا هجرح حد فيها بالبعد
ولا هجرح الصورة الاصلية
ولا هكسر البرواز كله
مش عارفة

----

ملحوظة :

اتمنى نيو لوك المدونة يكون عجبكم
وفترة قفل البلوج مش تكون اثرت على مكانتنا عندكم
:)

(كفايـــة طيبــــة)

I loved my lonliness :(

اد مانا كنت متضايقة لما كنت بقضي وقت كبير فى عزلة الى حد ما
وبقضي وقت مع نفسي كتير اوى
وافكر فى حاجات كتير اوى
واد مانا كنت نفسي حد يبقي معايا
اى حد بحبه يبقي معايا
واد مانا كنت بحس بوحشة عجيبة وانا لوحدي
وببص للبحر بليل واسمع اغاني معينة
مبقتش اسمعها دلوقتى
ولو سمعتها دلوقتى افتكر الحالة العجيبة دي
واد مانا كان نفسي ومنى عيني انى اجي هنا
بالرغم من كل ده
وكل السلبيات دي
الا إنى بعترف دلوقتى انى نفسي ابقي لوحدي شوية
وأعيش حتة صغيرة من التأمل اللى كنت بعيشه تانى
انا مش بقول ارجع اعيش تانى غربة ووحدة كاملة وعذاب تانى
بس نفسي ارجع اتكلم مع نفسي تانى
واعرف هي محتاجة ايه ونفسها فى ايه واعملهولها
حاسة انى مقعدتش معاها بقالى كتير
ولا عارفة هي عايزة ايه ولا بقت تتكلم ازاى دلوقتى
نفسي اعرف هي حاسة بايه دلوقتى
معرفش هي مبسوطة ولا لا ؟
مبسوطة باللى هي فيه ولا ............
ولاّ .............
عايزة ترجع تانى لوحدتها ؟
اصلي حسيت انها بتشاور عقلها فى وقت من الاوقات
وبتقولى هو احنا ايه اللى خلانا نرجع ؟
ساعتها زعقتلها جامد وشخطت فيها
وزعلتها
ولغاية دلوقتى متكلمناش فى الموضوع ده تانى
ومش عايزة اتكلم معاها تانى فى الموضوع ده
ومخاصمين بعض بقالنا فترة
لغاية ما ترجع تفكر كويس زي الناس تانى
اصلا هي اتعودت على الغلط
عودتها على التفكير وحدها والقعدة وحدها
وكل حاجة تعملها وحدها
بس هي شكلها حبت الموضوع
ومش عايزة تبعد عنه
بس مش هينفع
خليها بقي زعلانة
لغاية ماتيجي تقولى غيرت رأيي
وتصالحنى

(كفاية طيبـــــة)

هذيـــان

ضوء القمر
انعكاسه بعينيها
تلك العيون المبتسمة دائماَ كلما رأته
بالرغم من كل العثرات بحياتها
لكنها تنشر على كل من تعرفه الدفء
---
كانت معي
بجانبي دوماَ بجميع الطرقات
وعندما فكرنا فى عبور الطريق
تركت يدي
وابتعدت أميالا
ثم وقفت ونظرت لي نظرة مزمجرة ساخطة علىّ
واشاحت بوجهها
ولم تنظر لى حتى الآن
---

كلما دخلت عليها غرفتها
التفّت بأغطيتها البيضاء
خوفاَ مني
او خوفاَ علىّ
لم أكن أعلم وقتها
ولكنى الآن
فقط
علمت
---

غطتنى الظلمة بكل استارها
لم يتبقي إلا ستاراَ مرتفعا هناك
خلف جميع البشر
أحاول القفز بمكانى محاولة لرؤية ما وراء الستار المرتفع
ولكن تحملنى الأيادي الى كواليس الستار المظلمة
---
يحاول فتح عيناه بصعوبة
اثر الصخب الذى هاجم جهازه العصبي بشكل مفاجيء
يسمع صوتاَ كمن يحتفى بيوم زفافه
مختلطاّ مع أصوات مشاجرات المارة
ويشوبه بعض من اصوات البائعين الجائلين
تدق الساعة التاسعة و15 دقيقة مساءَ
يوم الخميس
وتعود ذاكرته الى نفس ذلك اليوم
فى عامه السالف
قائداَ سيارته باتجاه منزله
لم يدر لماذا تذكر ذلك التوقيت بالتحديد؟
لكنه لم يكن يوماً متميزاً بأى حال من الأحوال
----
أطفال بسطاء يلتفون بدائرة
يلعبون لعبة ما
يحبونها كما يحب الطفل الميسور لعبته الاليكترونية
يرمون بعض الحجر الصغير بمنتصف الدائرة
ثم يدورون حولها
لا افهم حقيقتها
ولكن هذا ما استطعت لمحه خلال نظرتى السريعة
قبل ان اكمل طريقي
أمرّ على مقهى
اؤثر دائما الابتعاد عن المقاهي خلال سيرى بمفردى
اتقاء لشر المشاجرات وعيون الجالسين
والقيت نظرة قصيرة عليها
لأقارنها بما أراه فى حلقات الدراما
وبالفعل أرى الطاولات بسيطة الصنع
واكواب الشاي والقهوة التقليدية ساخنة
دون أى زخارف او أشكال مبتكرة
يخرج منها الدخان
واسماء المشروبات واسعارها كتبت بخط يدوي على جانب من حوائط المقهى
----

طيف ؟!!
ما معنى كلمة طيف ؟؟؟
هل هو خيال وليس له وجود على ارض الواقع ؟
ام هو حقيقة تمر سريعاَ بالحياة ؟
رأيته طائرا امام عيناى
أحاول تنبيه اخى لوجوده ولكنه لا يراه
أسأله مراراَ : ألا تراه ؟
يجيبنى بالنفى ونظرة الجزع تملؤه اتجاهى
يظننى أهذى
لكننى أراه وحدى
يطير حولى واحاول مفاداته كلما اقترب
اثبت نظرى عليه لأرقب حركته
ثم
بحركة مباغتة
اقتحمني
وسكن داخلى
----
في قهوة عالمفرق في موقدة و في نار
نبقى أنا و حبيبي نفرشها بالأسرار
جيت لقيت فيها عشاق اتنين صغار
قعدوا على مقاعدنا سرقوا منا المشوار
يا ورق الأصفر عم نكبر
الطرقات البيوت عم تكبر
تخلص الدنيي و ما في غير يا وطني
يا وطني أه بتضلك طفل صغير
متل السهم الراجع من سفر الزمان
قطعت الشوارع ما ضحكلي انسان
كل أصحابي كبروا و أتغير اللي كان
صاروا العمر الماضي صاروا دهب النسيان

هذيان بقلــم
(كفايــــة طيبــــــة)
ماعدا اغنية فيروز الاخيرة

ادعوا معايا

اللهم رب الناس ، أذهب البأس ، إشف أنت الشافي لا شفاء إلا شفاؤك شفاء لا يغادر سقما ً

كــل حاجة

بسم الله الرحمن الرحيم

بصوا بقي

البوست ملخبط
وانتوا واحشنّى
والموضوع كبير كبير كبير يعني
وانا بقالى فترة مش بكتب
وبطمن عليكم من البنت "وجدان جريح
وبقالى فترة مش بتابع المدونات كلها
نظرا لمرورى بوعكة صحية
والحمدلله فى نهايتها
وعدم استقرار فى الاوضاع نتيجة السفر والمصيف والحاجات دي
عشان كدة هتبقي الدنيا ملعبكة شوية فى البوست ده
وكان عيد ميلاد وجدان يوم الاتنين اللى فات 3/8/2009
وانا كنت تعبانة ومقدرتش اقولكم
وهي مكفوسة تقولكم ومكفوسة تقولكم اعملولى عيد ميلاد
لا بقي
انا مش كدة
كل سنة وانتى زي القمر ياوجدان
ومبروك مقدما التخرج لغاية ما النتيجة الازلية دي تطلع
وان شاء الله السنة الجاية احضر فرحك بقي واقوّم عريسك واقعد مكانه
:P

جبتلك حبيبتك وهي مسكالك التورتة
:D
وبعدين طمعت فيها


على فكرة انا مش هتكسف اقولكم ان عيد ميلادى قرب انا كمان وهتعملولى حفلة حلوة
انا عارفاكم مش هتدخلوا فاضيين عليا
انا عايزة شيبسي بالكباب بس
انا قنوعة يعني
وهبقي ادى شوية لوجدان
ومش هقولكم احنا تمينا كام سنة حقنا للدماء ومنعا للاحراج
انا جبتلى صورة مناسبة لعيد ميلادى انا بقي


فى حاجة تانية مفرحانى بقي
امبارح لقيت واحدة صحبتي بتضيفنى عالفيس بوك
ولما قرأت اسمها مكونتش قاعدة مصدقة
البنت دي من اول مااتخرجت وانا معرفش عنها حاجة
ولا تليفون حتى
وكنت بحبها فى الله بجد ايام الكلية جدا
وكان اخر حديث بيننا كان اخر يوم فى امتحاناتنا وخلاص كدة
وانا سافرت ومبقاش فى تليفونات ولا اى حاجة
امبارح بس لقيتها بتضيفنى وبتكلمنى
بعد انقطاع سنتين
ده شيء جميل على فكرة
انك تحس ان حتى وانت مش موجود مع الشخص اللى ادامك
بس هو فاكرك دايما بالخير
وده كان احساسي ناحيتها


حاجة رابعة بقي ولا الخامسة دي
انا مبسوطة اوى اوى اوى بأنى ان شاء الله هقضي رمضان هنا فى مصر
ان شاء الله لو ليا عمر يعني
رمضان فى مصر تحفة بجد
ومبسوطة انى قادرة اقولكم كل سنة وانتم حلوين وامامير
وتستغلوا رمضان كويس اوى المرة دي
بلاش زي كل سنة ...
ماشي ؟؟
واللى مش متعود ينزل التراويح يروح يجرب السنة دي
اللى هيجربها مش هيقعد فى بيته بعد الفطار تانى
وبلاش تليفزيون كتير
انا بشوف ناس بتقعد بعد الفطار لغاية السحور على التليفزيون
وانا بيجيلي شلل من حالة الخمول دي
من مسلسل لمسلسل ومن برنامج لبرنامج
بجد بيجيلي حالة عصبية من المنظر ده
حتى فى الايام العادية مش رمضان بس
الحمدلله ان بيتنا مش غاوى تليفزيون ومسلسلات

المهم يعني
كل سنة وانتم طيبين
جبتلكم معايا شوية فوانيس كدة


معلش البوست مفيهوش اى حاجة جد
بس هو مجرد اعلان عن وجودى فى الحياة
وتهنئة بمناسبة رمضان
وخدوا بالكم من بعض كتير

وحشتونى
^-^

(كفايــــة طيبـــــة)

اول واخر تاج

اولا طبعا كالعاده لازم اعتذار

فانا اسفه علشان مش رديت من زمون على التاج دون

التاج د من احساس طفله محبه للرومانسيه بس واقعيه

اول تاج ليا هنا ف البلوج واخر تاج بأذن الله :D

بس خلاص

...........................................................



من أنت ؟
انا حد لسه بيدور على نفسه بس مش لاقيها ..لو لقيتيها قوليلها تجيلى هنا



وما الذى تفعله هنا ؟
انا قاعد مستنى نفسى

خلاص جد بقن

انا هنا علشان احاول اكتب حاجه حساها جوايا مش عاوزه اقولها لحد

face to face

علشان مش طول الوقت بيحسونى ومش طول الوقت بيبقى تركيزهم معايا وانا بكلمهم



إسرائيل تقصف كل جنوب ممكن بحثا عنك ، أى شمال ستقصد .

لا انا مش هتحرك من مكانى ..هما يجولى لغايه عندى


وبعدين انا اقوم بالواجب معاهم


انا امنيه حياتى اموت شهيده

وفرصه جتلى



أنت مكلف بحذف حرف من حروف اللغة العربية .. أيها ستختار ولماذا ؟

احذف لأ طبعا برضه... دى لغه القرآن ....

وبعدين مش كفايه انى ضاربه الحروف كلها ف بعضها كمان احذف



لو قدر لك أن تدخل السجن فما هي القضية التي تتمنى ان تدخل بها إليه؟

ف هذوه اللحظه بالذاتن


صدقينى هدخله ف الشخص اللى مأخر ظهور النتيجه بتاعتنا



بالمناسبة.. منذ متى اكتشفت نفسك؟


:D انت متعرفش مش انا لسه مش عارفنى


بصراحه لسه مش اكتشفت نفسى بالدرجه اللى ارضى بيها عنها


بس باذن الله كلها اسبوع واعرف انا مين



على مفترق طريق لافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

اعتقد انى هفضل ف مكانى مش سلبيه منى لا

بس علشان اعتقد انى هحس بفرحه اكبر لما اوصل لحلمى بعد ماكون بذلت كل مجهودى علشان اوصله واكون زى


مبيقولوا وصلتله بعد طول عناء

عن انى اوصله بسهوله كده



نحن لا نعيش حياتنا بل نتعلم فيها كيف نعيش» ما تعليقك؟

بينهم اتفاقيات تبادل تجارى

يعنى احنا عايشين بنتعلم حجات جديده كل يوم

واللى بنتعلمه بنعيش بيه



بجملة واحدة فقط أكتب تعريفاً لكل كلمة من الكلمات التالية:



الوطن

مكان احتوانى بكل نزواتى وحماقاتى ..فيه الناس اللى بحبهم وبرتاح لوجودهم حتى لو مكنتش اعرفهم بس اتعودت

اشوفهم

الأم

اعتقد الحنان ...الحب ...الاحتواء ..حجات كتير اكيد بس مش لحقت اكتشفها

الليل

الهدوء والرومانسيه ...بس د بيتوقف على مود الشخص

الحب

ضعف

أمريكا

ذكيه وسوسه وبتعرف تلعبها صح



المرأة


لغز حير الرجال ..جمله قراتها قبل كده كانت عسوله قوى كان بيقول فيها



(احمق من قال انه فهم امرأه ) مش فاهمه ليه مع ان الموضوع مش غامض للدرجه دى



الصمت

لغه المشاعر المعذبه... احيانا كتير بيعبر اكتر من الكلمات ...بس لو فى تخاطر ذهنى او قراءه افكار تبقى الحياه

وقتها لذيذه قوى

الانترنت

وسيله 99.9% من الشباب بيستخدموها هنا استخدام خاطىء



أخترمنصباً واتخذ قرارا ؟

رئيسه جمهوريه نفسى .... انا حد بيمل بسرعه جدا فاى منصب اختاره مش هيكمل معايا نص يوم

خلونى هنا



قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

علشان كان قيس وعنتر بيحبوهم

الولاد بيكتبوا شعر طول الوقت ف وجود الحب وف الفراق

البنات بيكتبوا الشعر بس بعد الفراق :D

محدش يضرب



أن تكون مطلوبا لارتكابك جريمة ، خير لك من ألا تكون مطلوباً مطلقاً "
هل تتفق مع هذه العبارة ؟ علل

د بيعتمد على القضيه نفسها ايه


بس انا مش مع المبدا د



إلى أين تمضي كلمات الحب .. بعد أن نقولها؟

:D

بتبقى ذكريات عايشه جوانا



هل تجد علاقة بشكل أو بآخر بين المرأة وقطاع الطرق ؟

على اعتبار انها بتثبت اى حد يعدى من قدامها وتقلبه


لا طبعا مش فى اى علاقه

المرأه كائن رقيق جدا حتى لو حاولت تظهر غير كده

وقطاع الطرق ...اكيد مش رقيق

لو بدأنا المقارنه هنظلم قطاع الطرق:D



هذا فراق بيني وبينك .. متى ولمن تقولها ؟

اى حد يتعدى حدوده



كيف هو غداً ؟

بستناه من زمان بس لسه مش جه ... ف غد واحد بس اللى لما ييجى اقدر اوصف بعديه كيف هو غدا



امرر التاج الى

هو اعتقد الناس كلها خلاص جاوبت عليه من نص قرن

بس اى حد يدخل ويكون مش جاوب عليه قبل كده

ود مش اختيارى يعنى اى حد هيتقفش مش مجاوبه هيجاوبه... علشان ف غرامه


كان معكم من امام شاشه الكعبوتر

وجدان جريح

just 4 u

ابلغ حبيبا في ثنايا القلب منزله



اني وان كنت لا القاه القاه



وان طرفي لموصول برؤيته



وان تباعد عني فسكناي سكناه




ياليته يعلم اني لست اذكره






وكيف اذكره ....اذ لست انساه


وجدان جريح


انا اسفه خالص يا جماعه كنت نسيت اكتب انه

منقووووووووووول

بس بحبها قوى

: )

Happiness Is A Decision

Take it Now

:)

راجعــالك

بسم الله الرحمن الرحيم

بقالى مدة مش عارفة اكتب حاجة

مع انى واحشانى تعليقاتكم اوى وزيارتكم للبلوج

:)

حتى دلوقتى مش عارفة هقول ايه

بس عايزة ابشر الناس اللى اكتئبت بسبب متابعتهم لبوستاتى فى المدونة

انى الحمدلله هديهم هدنة من كمية الكآبة

وابتعد قليلاً عن مثيرات الكآبة داخل نفسي

وهبعد عن المحيط السخيف اللى كان مسببلى الموضوع ده شوية كدة

وارجع لبيئتى الاصلية

وهرجع لبيتي الصغير

واوضتى الضيقة

اللى مليانة كراكيب ودباديب ومكتب عليه اثار المزاكرة اللى سبتها من سنتين

وراجعة لشقتنا اللى فى وسط الشوارع المتربة اللى بحبها

وراجعة اشوف وشوش الناس اللى اتعودت اشوفها كل يوم

مش مجبرة انى اشوفها بقي زي هنا

لا دول مختلفين

دول حابة انى اشوفهم كل يوم الصبح

وهرجع انزل الصبح اجيب فول وطعمية من عمو بتاع الفول اللى جمبنا

ويسيب طابور الرجالة اللى كلهم ماسكين قراطيس فاضية فى ايديهم ومستنيين الطعمية لما تطلع

ويخلصنى انا الاول ويديني الفلافل السخنة اول ماتطلع

وافتكر ان الحركة دي ممكن تضايقهم عشان هم مستنيين من قبلى

الاقي ابتسامة صافية من كل حد منهم بتقولى "صباح الفل"ا :)

هرجع اركب مواصلاتها تانى

وكل مشوار انزله افكر قبلها بربع قرن مثلا هركب ايه عشان أوصل بأسرع الطرق

او عشان اوفر وقت

ساعات بفشل وساعات بنجح

هرجع اركب السي تي ايه من اول عندنا فى مدينة نصر لغاية التحرير تانى وانزل الاقي هاجر مستنياني فى مكاننا اللى ادام هيلتون رمسيس

فى عبد المنعم رياض

هرجع اشوف وشوش بحبها اوى

وعلّمت جوايا اوى

ودي بالدنيا كلها :)


كل ما افكر فى الـ 3 شهور الجايين

احس انى فى موود مختلف تماماَ

اختلاف جذرى

حاسة انى هنتقل لكوكب تانى

ستايل حياة تانى

عيشة تانية

حتى الخلافات والخناقات بينى وبين عيلتى هتبقي مختلفة

وهتبقي على حاجات عمرنا ما اتخانقنا عليها واحنا هنا

بس دايما نتخانق عليها واحنا هناك

وفى حاجات العكس

وحاجات هنتفق عليها ونفرح بيها اوى مكانتش بتفرحنا هنا

وحاجات كانت بتفرحنا هنا هتبقي عادية هناك

حتى اللبس ممكن يختلف

او يمكن الاحساس هو اللى بيختلف باللبس

الواحد بيحس انه بيهتم بنفسه اكتر

بيحس ان فى حد لازم يظهر ادامه بشكل كويس

مجرد نزولى فى الشارع لازم يبقي بمظهر كويس

حتى لو مش هقابل حد

راجعة انام كويس

بعد شقاء سنة كاملة من قلة النوم والارق غير الطبيعي

اسلوب النوم السنة دي كان اكثر من بشع

هو ممكن حد يكون مش عارف ينام سنة بحالها؟

انا اخر مرة نمت كان يوم 8 سبتمبر 2008

من ساعتها انا صاحية

بس راجعالها خلاص ان شاء الله

راجعة اكل الاكل بتاعها تانى

بالرغم ان نفس الاكل موجود هنا

بس الاكل هناك له طعم تانى

ميزهّقش

حتى لو اكلت نفس الاكل كل يوم

راجعة اشوف ستات عجوزة نازلة الصبح بدرى تجيب الخضار وتتناقش فى سعره مع البياع

ويتخانقوا وصوتهم يعلى وتقوله هروح اجيب من حد غيرك

وفى الاخر مابتشتريش كل يوم غير من عند نفس الراجل

وكل يوم تحصل نفس المناقشة وبردو بتنتهى نفس النهاية

مش عارفة ليه برغى فى التفاصيل دي

ملهاش لازمة

بس اصلي الحاجات دي بحبها اوى هناك

راجعة اروح الجامعة

واتطمن عليها

زي ما بعمل كل سنة من بعد ما اتخرجت

واشوف ايه اللى عملوه جديد

وازور كليتي

واسلم علي الدكاترة والمعيدين

واصحابي اللى بقوا معيدين :)

راجعة اروح اتمشي على النيل مع هند وهاجر

ويقعدوا يتخانقوا مع بعض

وعلطول يشدوا فى الكلام مع بعض

مع ان مفيش اتنين بيحبوا بعض ادّهم

تصوروا ناس صحاب بقالهم 6 سنين وكل مايتقابلوا يشدوا مع بعض فى الكلام

وانا افضي بينهم

ولما أيأس منهم اسيبهم وامشي

واقولهم على فكرة دي مبقتش عيشة اللى انتوا فيه ده


وبعدين نرجع نكمل فسحتنا عادي جدا ولا كأن حاجة حصلت

مش ناسية الاجازة اللى فاتت

لما كنا رايحين سينما مع بعض احنا التلاتة

وكان فاضل 10 دقايق على معادها

واحنا ادامنا لسة يمكن نص ساعه على الاقل عشان نوصل

وجم شدوا مع بعض فى الكلام

راحت هند واخدة بعضها وماشية وهاجر بتقولى شوفتى صاحبتك بتعمل ايه وبتشخط فيا

طيب ياهاجر بتشخطي فيا انا ليه

العيال دي عصبية بس بحب اتفرج عليهم وهم بيتناقشوا

ويكونوا متنرفزين

ولما يلاقونى بتفرج عليهم بهدوئي المعتاد وعلى وشي ابتسامة خفيفة من اسلوبهم

ياخدوا بالهم ويضحكوا على نفسهم ويصفوا من جوا ولا كأن شيء حصل


راجعة لتفاصيل مشتاقالها اوى

ونفسي الاقيها زي ما هى

متكونش اتغيرت زي ما كل الناس بتقول

انا واثقة انها مش هتتغير

او على الاقل احساسي انا بيها مش هيتغير

صح ؟؟

انا مش عارفة لغاية دلوقتى انا مبسوطة ولا لأ

بس كل اللى عارفاه انى مرتاحة اوى

كأنى لما لقيت التذاكر فى ايدي ووجهتها القاهرة

كأنى روحت لدكتور نفسي واتعالجت علاج كويس جدا

غريب اوى المرة دي انى مفرحش كـسعادة

بس سعيدة كـارتياح

مش سعادة هوجاء يعني

بس متفائلة خيراً بالاجازة دي

وحاسة انها هتبقي اكثر تعقلاً من السنة اللى فاتت

ان شاء الله

على العموم

انا سايبة البلوج امانة فى رقبتكم

وصيتكم البلوج ووجدان جريح

والعيال

والكومنتات

وياريت لو حد داخل نفسه أى شيء ناحيتي يحاول يسامحنى

انا داخلة على سفر وطيارة وحركات

ومش طالبة اى زعل من اى حد

واللى عايز ادعيله بحاجة اوك بما انى مسافرة يعني

ويارب تكون مستجابة ان شاء الله

وانا هبقي متابعة الكومنتات ان شاء الله لغاية ما امشي

وولو لقيت وقت فاضي هرد عليها باذن الله

علشان هيقتلونى شغلاً لما عرفوا انى نازلة اجازة

بس مش هقدر اتابعكم بعد كدة

لأنى مش عارفة لسة هيبقي ايه نظام النت فى بيتنا فى مصر

ومش بعرف افتح البلوج عالموبايل

يعني متقلقوش لو اختفيت فى ظروف غامضة

:D


كلمة اخيرة
غيرتيلي حياتي اوى فى اخر شهر
وحسيت ان بقي ليا ضهر فى البلد دي
يارب دايما تبقي كويسة وقوية زى ماعرفتك
ومفيش اى حاجة بتشوفيها هنا تخليكي تتهزى من جوا
كلها ايام وهتعدي
زي غيرها

هفتقدك اوى بجد ياهنودة
:)

كابتن كابتن ف طوبه هناك نسيت تحبها1

الاول عاوزه اعمل اعتذار كبيييييييييييييير جدا

علشان مش رديت على الكومنتات المره اللى فاتت والمرات اللى قبلها :D

بس دى مؤامره عالميه متواطىء فيها النت بتاعى والبلوج د وينكن بحثن الشريك الصامت اللى معاهم


بجد بعتذر جدا لان البوست مش ليه اى اهميه من غير كومنتات


....................................................

العونوان ممكن يكون غريب شويه

بس انا طلبت معايا اكتب النهارده

وعلى حين غره لقيت العنوان د جه ف دماغى

وهو مفسر نفسه خالص

اصل بصراحه بدات اتشل من الولاد

مش راحمين نفسهم

الاول قبل مأكمل كلام

عاوزه اقول انى مش بتكلم على كل الولاد

انا بتكلم عن تلك الفئه الكبيره من المجتمع التى تنطبق عليها تلك المواصفات

ايون انت يالى ورا هناك ..اييييييييييييون انت

لا بجد الملتزمين الكويسين سواء ولاد او بنات الايام دى انقرضوا وفى انقراض مستمر

مش فاهمه ايه بيحصل ف الدنيا دى

بقيت حاسه ان الولاد كلهم ماشيين الايام دى تحت شعار ظبط ظبط تظبيط للبيع

ومعنى كلمه تظبيط ف اللغه يعنى ممكن نتعرف لو سمحتى

او انا فاهمه كده مش عارفه الكلمه ليها معنى تان ولا لأ

بس هى دى كل الفكره يعنى

حتى الشات بوكس اللى محطوطه ف البلوجات

تلاقى واحد امور داخل يقول

ممكن اتعرف على بنوته دمها شارابات

روح يابنى ربنا يهديك

يعنى هى قفلت معاك الشات والدردشه ماليه الدنيا مين اللى رماك ف شات بوكس

المهم اللى حصل انى من فتره كده

كانت طالبه معايا غباء وتخلف ف تفكيرى

وقولت بدام الدنيا مقفلاها ف وشى كده وانا مش بعمل حجات غلط كتير

يبقى خلاص هكون حد مش كويس يمكن تبقى كويسه معايا

عارفه ...علشان كده قولت طلبت معايا غباء ف تفكيرى

ام هند كان قمه الحجات الغلط اللى فكرت فيها انى ادخل دردشه

واقولهم كلمه السر

ممكن نتعرف

ويبقى مبروك ربحت الزعطلون

المهم بعد محاولات دامت 3 ساعات وربنا مش بهرج

3 ساعات علشان ادخل دردشه مش فاهمه ليه

ودردشه تشيلنى ودردشه تحطنى وزلازل وبراكين

فييييييين لما دخلت لقيتنى خير اللهم اجعله خير ف مكان وااااااااااسع والدنيا حوليا لونها ابيض

وكائن بشرى وحيد موجود ف المكان

من الاخر دخلت دردشه مهجوره (كان لازم اعرف من العناكب اللى واقفه برا )


المهم لقيت

كلمه هاااااااااااااااى كبيره كده جايه من بعيد

اكتر حاجه بتزعجنى ف الدنيا انى الاقى ولد يقول هاى

ام هند

مرديتش

لقيته بيقول ممكن نتعرف ؟؟؟

كنت هقوله

ليه يعنى خير

وبعدين حتى لما اقولك انا تفيده وانت عتريس

ايه يعنى وبعدين


محنا عارفين ان د كله بطاطس ولا انت عتريس ولا انا تفيده


بس برضن منا اللى غلطانه انا ايه دخلنى هنا

وعلى رأى بحثن

قومى بينا نمشى


المهم انى مجرد مشوفت كلمه ممكن نتعرف دى حسيت بقمه الشذاجه اللى ممكن تكون

موجوده ف الدنيا كلها

هما ليه مش بيحسوا بالسذاجه وهما بيقولوها ؟؟؟

وليه مش بيحسوا بالسذاجه لما يكونوا بيكلموا واحده ويقولولها بدال صباح الخير

بتكون وحشتينى وبدل اذيك بتكون بحبك

فعارفين انتوا بقن سيمفونيه بحبك وحشتينى الازليه طول اليوم

وف نفس ذات اللحظه بيكلموا واحده تانيه يقولولها انتى اللى ساكنه ف الحته الشمين من قلبى

السذاجات كتير بس هكملها ف بوست تانى


ومش بس شذاجات ولاد

لأانز شذاجات البنات كتير قوى هى كمان



اسفه انى طولت كتير كده



وجدان جريح