خليك كدة عبيط

مستني مين تانى 

عايز مين تانى يدوس عليك 

ولا انت اتعودت انك تبقي مداس 

مستني لما حد ميستاهلش منك ربع ضحكتك فى وشه يسيبك ويمشي 

مستني لما تدّى كل اللى عندك لحد ويقولك مع السلامة معطلكش 

ولا مستني انك تعيش مليون حب فاشل زيك 

يمكن مستني المعجزة اللى انت دايما بتتخيلها 

وهو ان حد يحترم مشاعرك وحبك له ويقدّرهم 

مش لازم يبادلك زيهم ولا فى قدرهم 

المهم يقدّرك ويقدّر احساسك ناحيته 

فوق يابني 

دي معجزة ومش هتلاقيها كتير 

اقصد 

دي خرافة مش هتلاقيها خالص 

هفضل لغاية امتى اقولك فوق وانت مبتفوقش 

بس على العموم تستاهل 

احسن 

خليك كدة 

سورى "عبيط"ا

(كفاية طيبة)

برد-حنين-استهبال ^_^

برد...برد ...برررررد

برد بجد يعنى مش هزار

برد من النوع اللى مهما تلبس فيه تقيل وتستخبى تحت 20 بطانيه

ولسه حاسس بالبرد

برد يخليك تفكر هو انت فعلا بردان !!! ولا قلبك هو اللى بردان!!!

طب هوالناس اللى بيحبوا بردانين برضه كده ولا قلوبهم مدفياهم

نظام قلب واحد لا يكفى للشعور بالدفء لابد من تواجد قلبان

ومفيش قلب تالت هديه مجانيه^_^

"وجدان جريح"

يــداه

 

لطالما أحبب يداها الصغيرتان

التى كانت دائما ما تشعره انها حاميها الوحيد 

كانت تختفى بين اصابعه 

وكأنها طفل صغير يختبيء من شرور العالم الخارجي

داخل احضان آمنة 

وعند خوفها , فرحها , حزنها , اشتياقها ,حبها

تضغط علي يداه وكأنها تخبيء رأسها بداخلها 

فيضمها اكثر واكثر بين يديه 

حتى يتسرب شعور الأمان بداخلها 

وداخله 

أما الآن 

فقد تغير الحامى 

وتغيرت الأيادي 

واختـــفى الأمـــان 

(كفاية طيبة)

عدنــــــــا ...ومن داخل ارشيف ذكريات كليه تجاره نحدثكم

.... حاسه انى عاوزه ادخل تجاره من تانى وابدا معاها صفحه جديده

ادى حصيله 5 سنين ف تجاره وكل اللى طلعت بيه....

1- ان ف شريك متضامن وشريك موصى وشريك ف الاستخبس مش فاكره كان اسمه ايه ...
ويمكن يطلع واحد من الاتنين اللى فاتوا دول .


2- لازم طول مانت ماشى مع نفسك تفضل تقول منه له علشان الناس تفهم انك فاهم

حتى لو فاهم قول منه له وانطلق ...


3- القوائم الماليه ..والموازنات... وطبعا عمرها مظبطت معايا ...علشان كده اسسنا علم محاسبى جديد

بيعتمد على ان القوائم لازم ميتساواش فيها الجانب المدين والدائن او الاصول والخصوم.


4- الارض ملهاش اهلاك يابنى خلى ف مخ ...سؤال بقه يطرح نفسه ..يعنى ايه ارض ؟؟؟


5-التضخم ..والتضخم دى لازم تقولها بلهجه تخلى اللى قدامك يتخض .


6- الاختلاس... وطرق الاختلاس اللى معنتش فاكره منها حاجه

مع ان وربنا كانت اكتر محاضره مركزه فيها .


7- التأمين ...حرام علشان كده مش ذاكرته .


8- البنوك والفوائد ف كلام انها ربا ..و علشان مندخلش ف مشاكل نذاكر البنوك الاسلاميه

اتلغت ياعم ...ومش جايه ف الامتحان... يعمر بيتك يا دكتور.


9-قانون تجارى ..فضلنا طول التيرم نتناقش حول قانون واحد..

(قانون الاسد)

ياترى هل ينطق قانون الأسد

اللى هو ملك الغابه ؟؟؟؟

ام قانون الأسد بضم الالف ؟؟؟

وف الاخر جه ف الامتحان وعشان مكانش ف اجماع ف التسميه ...

عملنا اضراب عن اجابه السؤال.


قررت ف الاخر انى اجمع كل كتب الاقتصاد اللى عندى وابدا اقرأ فيها من تانى

وبعدها كتب المحاسبه وهكذا ..

بس لقيت قدامى المذكرات اللى كنا بنشتريها بعد منشترى الكتاب

ونذاكر منها علشان نحافظ على الكتاب معزز مكرم انضف من الصينى قبل استخدامه .

ولقيت نفسى بحكم العاده بجمع المذكرات عشان اقرأ فيها

وبشيل الكتب ف المكتب علشان احافظ عليه انضف من الصينى بعد غسيله للاجيال القادمه.

........
ف النهايه احب انصح كل شاب وكل فتاه


لا تستهبل ..وذاكر يابنى ..ولو عمك سرق الكتب عشان متذاكرش


اشترى الكتب تانى من الفلوس اللى انت مقلبها من باباك


ثمن الكتب والكورسات بما انك واخد تمنهم مرتين وباسعار مش حقيقيه

ونصيحه ..كل واحد يخلى باله من التراكمى بتاعه

..
(وجدان جريح)او
كما يقال الايام دى (حديثى التخرج 2009)

مش معاكم ولا هكون

انزوى بعيدا

لم يصمد معي

قال لى فى نصف طريقي المتعرج

لن اكمل مسيرتك العرجاء

فلم اخلق لذلك

واذا استمررت معك بها

سوف اخرج بتعرجات بقدمي

لن يداويها الوقت مهما فعل

انطوى بركن من اركان قلبي

واخذ بمراقبتي من بعيد

وانا احاول السير بين الحنايا والتعرجات

تارة افلح فى تفاديها وتارة ارتطم بها ارتطاما قويا

وتارة اخرى -وهي ما اخافه هو منها-اسايرها وامشي على نفس خطوط تجاعيدها المملة

فتصاب قدمي اصابة لا يداويها طبيب

ولا تستطيع تناسيها ايام



"شيء بداخلى"ا

(كفاية طيبة)

هاتولى قلب

و هاتلى قلب لا داب ولا حب ولا انجرح ولا شاف حرمان

الحمـــدلله

زي انهــــــــــاردة

بوابة بين الموت والحيــــاة

14-يونيو-2009

(كفاية طيبــة)

استكفيـــت

بنقعد نقول كتير ان الناس بقت وحشة

كلنا

بلا استثناء

كلنا بعد اى موقف لازم نقول ان مال الناس بقت وحشة كدة ؟؟

السؤال اللى بيطرح نفسه عليا هنا

وهو ان طالما كلنا بنقول كدة

امال مين هم بقي الناس الوحشة ؟؟؟

لما كل الناس تقول كدة

هو ليه مفيش حد بيقول انا من الناس الوحشة دى؟

ليه كلنا بنفترض اننا من الجانب الطيب اللى دايما مغلوب على امره

مع اننا نبقي قاهرين اللى حوالينا وظالمينهم

هو مين فينا اللى كويس ؟؟؟

ساعات ببقي عايزة اطلع نفسي انا الوحشة

عشان اصبر نفسي على اللى بيحصل

وفعلا اقتنعت انى خلاص العنصر السيء بين الناس

انا النقطة السودا بينهم وهم الكويسين

وبعدين ارجع اقول مانا لو كنت سودا مكنش اللى حصلى حصل

انا لغاية دلوقتى مش عارفة

مش عارفة مين صح ومين غلط ؟؟

وايه اصلا الصح وايه اللى بقي غلط ؟؟

ولا هو كله بقي زي بعضه ؟؟

---

طيب وبعدين ؟؟

ايه آخرتها ؟؟؟

----

هو انتى ليه بعيدة كدة ؟؟؟

(كفاية طيبة)

شربنا خمرة ياعاطف

فى يوم من ايام عودتي من شغلى الأزلى 

مريت على الكشك اللى على ناصية شارعنا 

لقيت المغرب أذن وكنت عايزة اجيب عصير 

وقفت نقيت العصير اللى انا عايزاه 

ورايحة ادفع الفلوس  لعمو بتاع الكشك 

لقيت شاب كويس كدة 

لابس بدلة 

وشكله محترم يعني 

بيسأل عمو بتاع الكشك عن حاجة جالى اسبهلال منها 

او ازبهلال 

مش عارفة بتتكتب ازاى 

المهم 

بيقوله عندك "ورقة بفرة"وسجاير مش عارفة ايه كدة

لقيت الكشك اداله ورقة رفيعة كدة 

مع علبة السجاير 

وانا حاسة بالبتاع 

اصل انا كنت سألت احمد اخويا على ورقة البفرة دي 

وقالى انها اللى الناس بيلفوا فيها الحشيش 

فانا لولا كدة مكونتش ازبهليت لما شوفت الولد بيطلبها 

المهم لما الولد دفع الفلوس ومشي 

قولت لازم اعلق على الموضوع ده 

بقول لعمو:

هو ورق البفرة ده بتاع الحشيش ؟؟؟

قالى : هو حسابنا كام ؟؟

قولتله على حسابنا وحسيت انه بيتهرب من سؤالى المفاجيء الصريح 

والظاهر افتكرنى من مباحث المخدرات 

فكررت سؤالى عليه 

قالى ممممم ... اه 

قولتله : انت بتبيع الورق ده ليه ؟؟؟ 

لقيته بصلى بصة طويلة ومتنحة 

ومردش عليا 

وادانى الباقي وهو بيتمتم بكلمة :عادى بقي  يعني هي جت على دي

واخدت منه الباقي وماشية 

بس قبل ماامشي 

قولتله فى لهجة ساخرة ومشمئزة :

مش كفاية انك بتبوظهم بالسجاير 

كمان حشيش 

وطبعا مشيت بسرعة

 

قبل ما اسمع كلمة لا ترضيني او اتضرب

او اتحدف بحاجة 

بس كان نفسي اعرف ليه كدة بجد يعني ؟

طيب هو بيبيعها عايز يكسب ومش يهمه المباديء 

لكن ليه شباب كويسين كدة يشربوا حشيش؟؟

هو عادي ولا ايه ياجماعة ؟؟؟

بس كدة 

هو ده كل اللى حصل 

انهاردة 

الاثنين 3 مايو 2010

--------------

وجوجل بيحتفل بيوم ميلاد ام كلثوم 

 سبحان الله 

-------------

(كفايــــة طيبـــــة)

أعذب ابتسامة

توقف والتفت لها 

ومنحها اجمل وارق ابتساماته 

قائلاً :

"شكرا على النسكافيه"

ومضى

تاركاً إياها توارى ابتسامتها الخجلى 

وقلبها الخافق  

بداخلــها

(كفايــة طيبــــة)